عند الموادع دمع عيني غلبني
وطاحت بي الدمعه على كف سلطان
أحب يمنى عمي اللي حشمني
ومن لامني في حب سلطان غلطان
شيخ بالاخلاق الكريمة ملكني
وبالمرجلة فارس وبالرحمه انسان
ومن يزرع المعروف لابد يجني
ومن يفعل الاحسان يجزى بالاحسان
واللي يريد المجد لابد يبني
في قلوب وعقول المخاليق بنيان
أفاخر بعمي على الناس واثني
ويستاهل البيضا سلايل كحيلان
له موقف عند الملمات يثني
سلطان موقف والتجاريب برهان
الي انتهض يكفي والي مد يغني
والي تكلم كل شي معه لان
والي وعد يوفي والي قال يعني
والي ارتكا للحمل شاله بليهان
بالطيب جاوز كل هقوه وظني
الله يوفقه السعد وين ماكان

قصيده جميله ورائعه

صح لسانك .

بالتوفيق