يا زمن العجايب


زمان العجايب وش بعد ما ظهر
كل ما قلت هانت جد علم جديد

إن حكينا ندمنا وإن سكتنا قهر
بين قلب عطيب وبين راس عنيد

لو تفيد المدامع كان أسيل نهر
مير كثر التوجد والدمع ما يفيد

اصبر ايام واشهر واتصبر دهر
وان حصل لي مناتي جيت لوني بعيد

ارجي الله واراقب كل طالع شهر
يجلي الهم عني أو عسى ما يزيد

يا غزال فضوح الزين عنه أشتهر

في عيوني ملاك وسط قلبي وحيد

مخطي اللي يشبه وجنتك بالزهر
الزهر ما له رماح تصيب وتصيد

لو جحدت المحبة سقم حالي جهر
مير ما كل قلب ياصل اللي يريد