| | |
| |||||||
| القصص والروايات قصص, قصص قصيرة, رواية, روايات |
 |
| | أدوات الموضوع | إبحث في الموضوع |
|
#1 
08-07-2005, 05:56 PM
| |||
| |||
| بيموت عليها وهي ولا على بالها الحلقه الأولى الجو كان شديد الحرارة . . والريح عاصفه وحاره ومغبره . . في موجة جويه عاصفه مرت بها البلاد لاول مره منذ ست سنوات . . وبعد هالعاصفه اللي خربت البيوت الصغيره واقتلعت الاشجار . . واجتثت اعمدة الانوار من الشارع . . هطل المطر اخيراً وارتوت ابوظبي بكبرها بأمطار الرحمه في امطار لم تشهدها الدوله منذ امد طويل . . في هذه الاثناء لم يشغل ظبيه أي شي عند دراستها ( ماشاء الله عليها ) . . وتمت جالسة في غرفتها ما هزها منظر الجو وما حبت تضيع أي لحظه على نفسها من دراستها . . وكل شوي تدخل عليها امها عشان تغير جو وتنزل مع اهلها عشان تشوف المطر كيف بلل الدنيا بعد جفاف دام سنين طويله . . . ام سيف: ظبيه يا بنتي انزلي وشوفي الدنيا شوفي الرحمه ..يا بنتي الناس مب مصدقه وتدعي ربها . . ظبيه دون ما ترفع راسها عن الكتب والاوراق اللي في ايدها وكأنها بتاكلها اكل ( ماشالله عليها ) . . ظبيه : اسفه يمه عندي اشياء اهم . . بكرة ما بيقول لي الدكتور كيف كان شكل المطر . . ولا بيسألني عن فرحة الناس . . خليني هنا احسن . . ام سيف : يا بنتي ارحمي حالك والله ما يصير هاللي تسوينه بحياتك . . عيشي مثل الناس . . ظبيه : يمه فديتك عندي شغل كثير . . يعلني ما خلى ماني فاضية للمطر . . ادعيلي بالتوفيق.. وقبل ما تطلع ام سيف . . ام سيف : الله يسهل عليك يا غناتي ويوفقك للي فيه الخير..ويعوضك بدل هالتعب براحه العمر كله . . وطلعت ام سيف وبقيت ظبيه بالغرفة . . كان البيت الصغير اللي مكون من سبع غرف .. لناس على قد حالهم مكتفين باللي الله عطاهم ... غرفة ابو سيف وام سيف .. وثلاث غرف نوم ثانيه لاخوان ظبيه وهم سيف وعيسى و احمد .. وغرفة ظبيه ومجلس الحريم ومجلس الرجاجيل .. سيف اكبر واحد وعمره خمسة وعشرين سنه غير متزوج مخلص دراسته من جامعة الامارات .. وعيسى عمره ثلاثة وعشرين مخلص دراسته في التقنية .. وبعده ظبيه وهي في جامعة زايد .. عمرها واحد وعشرين باقي لها سنة ونص وتتخرج .. واخر العنقود احمد بعده يدرس في مدرسة خليفة بن زايد العسكرية الجوية في العين .. وعمره سبعة عشر سنة..وما يزورهم الا يوم الاربعاء والخميس ويوم الجمعة يرد العين ... وهذي ثالث سنه له في المدرسة الجوية .. وبعدها بيتخرج .. ............. المطر بعده ينزل وما وقف وابو سيف جالس يطالع من طاقة المجلس وينادي على ام سيف .. ابو سيف: يا ام سيف اختربت زراعتي لعب فيها المطر .. وغرقن الشتيلات اللي توني غارسهن ... ام سيف تبى تسوي عمرها فاهمه وهي تمثل الانصدام : بسم الله يا بو سيف وش اللي صار لك ... ابو سيف : امشي ياحرمه انتي ما تفهمين شي ... سيف يضحك : اها ابوي وحليلك ليكون بس خرب اللي سويته .. ؟ ؟ ابو سيف : ايه والله يا ولدي تعبي وشقاي ضاع هدر .. ويصرخ ابو سيف فجأه .. ابو سيف : سيف سيف الحق شوف النخل طاحن .. ام سيف مره ثانيه : أي نخل يا بوسيف .؟ ؟ سيف : يمه اسكتي لا يذبحنا ابوي الحين ... وطلع عيسى من غرفته ... عيسى: بحياتي كلها ما شفت مثلكم اللي يشوفكم يقول اول مره تشوفون مطر .. ياخي استهدوا بالله .. ام سيف تبي تسوي عمرها تعرف شي : ما تدري وش صار فينا يا ولدي يقول ابوك ان البرق حرق الزرع .. يفتح سيف عيونه وعيسى تم ساكت .. وابو سيف بعده يطالع المزرعة حقته ويضرب كف بكف .. انفجر سيف ضحك ... وعيسى صار يطالعه واخر شي الاثنين ما قدروا يمسكون عمارهم ونقعوا ضحك .. سيف مب قادر يرد على عيسى وناقع ضحك ... سيف : بطني والله ما اقدر ههههههههه... ام سيف : على ايش تضحكون يالمفلع انا وش اللي قلته غلط. .. انا بس قلت اللي ابوك قاله .. ............ هدت الريح شوي وخف المطر .. ودخلت ام سيف المطبخ تسوي العشا .. وبعدها دخلت عليها ظبيه تساعدها .. طبعاً حالتهم الماديه ما كانت تساعد انهم يجيبون خدامه .. وكل شي كان على راس ظبيه المسكينه وامها من تنظيف البيت وغسيل الصحون وترتيب كل شي .. وكانت ظبيه على الرغم من كل هذا ما تتأخر ابد في دراستها وعمرها ما كانت الا من المتفوقات (ماشاء الله عليها ) .. على الرغم من الظروف الصعبه اللي تمر فيها ... المهم حطوا العشا وجلسوا يتعشون جبن وزيتون ... على الارض .. في صالة البيت اللي كان شوي سقفها ويطيح عليهم من كثر ما هو متشقق ومتصدع من المطر والهوا .. عيسى : يعني ما فيه اكل الا هذا .. كل يوم جبن وزيتون .. ماصارت لاعت كبدي والله .. سيف : احمد ربك يا عيسى وقل الحمد لله غيرك يتمنى اللقمه تطيح ببطنه مره بالاسبوع .. عيسى : الحمدلله انا شبعت .. ام سيف: ما تعشيت ياوليدي وين رايح . . ؟ ؟ ظبيه : اللي مب عاجبنه اكلنا يدور له على بيت ثاني .. وطلع عيسى مع ان المطر ما وقف بس بعد ماخف شوي . . طلعت ظبيه غرفتها وتمت تكمل دراستها وترتب اوراقها .. ودخل عليها سيف .. سيف : اكيد مشغوله . . ظبيه مبتسمه : لاء بس الحين بخلص جالسه ارتب اغراضي . . سيف : وبعد ماتخلصين وش بتسوين . ؟ ؟ ظبيه : مادري والله ما عندي أي فكره . . سيف : وش رايك نروح نشوف شي بالتلفزيون.. ظبيه : ما حب التلفزيون .. ما فيه شي يعجبني فيه .. ويدخل عيسى ... متضايق .. عيسى : افف والله لين متى بنتم عايشين على هالحال.. سيف : وش فيك . . ؟ ؟ عيسى : التلفزيون ماهوراضي يشتغل . . كأن الريح شالت الدش من مكانه . . سيف : يا ربي وش هالحاله . . ؟ ؟ ظبيه:عادي تحملوا مكتوب لنا هالعيشه . . . وطلعوا من عند ظبيه وخلصت اوراقها ونامت . . . ............. في الجهه الثانيه كان بيت خادم اخو ابو سيف . . بخير ولله الحمد وما صار له شي . . لانهم كانوا ساكنين في منطقه مثل العالم والناس . . وبيوتهم مب شعبيه وقديمه مثل بيت ابو سيف . . كان في البيت ام ماجد جالسه مع بنتها مريم .. في صالة البيت الكبير ... مريم : ياحليلهم بيت عمي اكيد طاح البيت فوقهم . . اما ماجد : مب منهم من عمك البخيل . . اللي بيموت عالفلس . . ماجد بعصبيه : انتوا وش فيكم بتموتون حش في الناس. . ام ماجد: ما قلنا شي كذب . . مريم : يمه ماهو حب في عمي ولا في بيته . . كل هذا عشان حبيبة القلب ظبيوه . . ماجد: ايه حبيبة القلب . . حد عنده مانع . . ام ماجد: امحق حبيبة . . يا شين ما حبيت يا ماجد . . وطلع ماجد معصب من عند امه ومنقهر من طريقة كلامها عن بنت عمه وحبيبة القلب اللي بيموت عليها . . . ............... انتهت الحلقة الاولى نلقاكم في الحلقة الثانية اخوكم مهند بن عبدالله الدعيج التعديل الأخير تم بواسطة أخطر انسانة ; 14-09-2008 الساعة 01:32 AM  |
|
#2
09-07-2005, 08:55 PM
| |||
| |||
| اما الحلقة الثانية من قصتنا فهي الحلقه الثانية . . اليوم الثاني في الصباح استيقضت ظبيه ولبست ثيابها وعباتها المصكره . . وتحجبت وتغشت عقب . . وتمت تنتظر الباص خارج المنزل من اجل ان يوصلها الجامعه . . ويوم وصل الباص ركبت وجلست تسولف مع صديقاتها اللي من نفس منطقتها واللي معها من 13 سنه من اول ما درست في المدارس لين ما وصلت الجامعه . . . وخمسة عشر دقيقه ( ربع ساعة ) وهم واصلين باب الجامعه . . بدت الكلاسات وظبيه اول وحده في الكلاس ولا همسة ولا نفس تسمع وكأن محد في المحاضره الا هي . . وبعد ما يخلص كلاسها تتم جالسه على كمبيوترها تتعلم على برامج الكمبيوتر وما تحتك كثير مع البنات . . وما عندها غير صديقتين قريبات لقلبها وهم ريم ودانه . . مع ان الكل يحاول يتقرب منها لطيبتها وحسن اخلاقها واسلوبها الراقي في التعامل مع البنات . . طبعاً الكمبيوتر ما كان ملكها الشخصي . . بس بالايجار يعني اول ما تتخرج لازم ترده للجامعه . . لان ظروف ابوها صعبه كثير وما تسمح له يشتري لها الجهاز وهو غالي طبعاً . . عليها هي واهلها . . وفي الكلاس اللي هي جالسة فيه دخلن عليها بعض البنات اللي تعرفهن . . احلام : ظبيه يالله قومي بنروح نفطر . . ظبيه : لا مالي نفس . . امل : ليش مالك نفس . . افطرتي في البيت . . ؟ ؟ ظبيه : ايوه . . وهي والله لا افطرت في البيت ولا شي بس كلام . . . ما تبي تروح وياهم . . احلام مبتسمه : خلاص ظبيوه انا بروح افطر وبعد الفطور ابيك تفهميني شي مب فاهمتنه . . . عادي ما عندك شي ؟ ؟ ظبيه : افا عليك تامرين امر . . احلام : ما يامر عليك عدو يالغاليه . . امل : وين ريم ودانه عنك . . ؟ ؟ ظبيه : ما ادري عنهم عليهن كلاسات . . . مر الوقت وحضرت ظبيه كل الكلاسات . . وفهمت صديقتها كل شي . . وصلت الساعه خمس وروحت البيت . . واول ما وصلت البيت . . لقت امها جالسة في حوش البيت مع ابوها . . وسلمت عليهم . . ابو سيف معصب ووجهه معتفس : ظبيوه يالنحيسه ما شفتي وش اللي صار . . ظبيه مستغربه : بسم الله يابوي وش اللي صار . . ؟ ؟ ام سيف : سقف غرفتك طاح على الغرفه باللي فيها . . ظبيه مندهشه : بسم الله يمه شوتقولين . . ؟ ؟ وتنطل الشنطه باللي فيها وتركض رايحه لغرفتها . . . اللي بس يمكن توسع اغراضها والدالوب . . مثل ال store . . وقبل توصل فتحت الباب ولقت الغرفة مدفونه تحت سقف البيت . .وجلست على ركبها . . ظبيه: يا ربي وش اسوي . . ؟ ؟ اوراقي وكتبي ودفاتري . . . وش اسوي بدنياي . . ابو سيف: هذا اللي همك ( يقصد كتبها ودفاترها ) . . ؟ ؟ اما الثياب والذهب ما فكرتي فيه . . ظبيه مستنكره : هذا يابوي مال فاني ماله اساس . . بس علمي وينه من بيعوضني اياه . . ؟ ؟ وبعدين وش هالذهب اللي تتكلم عنه . . ؟ ؟ من متى انا عندي ذهب . . ؟ ؟ ابو سيف: فقدت هالوجه يا ربي . . وتدخل ام سيف:هاه يا بنتي وش اللي لقيتيه..؟؟ ظبيه : يمه لا تزيديني . . . عندي بروجكت انا جالسه اشتغل عليه نص شهر . . والحين ما ادري بلاقي بقاياه ولا لاء . . ام سيف : مالنا ذنب يا بنتي . . الله يهدي الحكومه . . وتركت ام سيف ظبيه تتحسر على شغلها وتعبها . . . ظبيه وهي شوي وتصيح . ." اشمعنى غرفتي انا ليش انا بالذات . . ؟ ؟ليش مب غرفة احمدوه اللي مافيها شي . . . اه يا ربي وش سويت ليه يكون حظي نحيس . . . " ............ بعد اسبوع من الخراب في المنطقه اللي تسكن فيها ظبيه واللي صار في البيوت . . بدت الناس تعدل في بيوتها . . وتحاول ترمم اللي تهدم . . وتحط خشبه على خشبه وتعدل سقف البيت . . وترد الابواب المكسور . . وتعدل سور البيت الخشبي اللي تهشم . . كان عيسى راجع من عند الشباب..بسرعه للبيت يالربع . . ويشوف ابوه جالس في الزراعه يعدل ويرد كل شي مكانه ويسقي . . وهو لابس قميص ووزار وواقف برا . . عيسى : ابوي ابوي وينك . . ؟ ؟ ابو سيف : هاه وش عندك وجعاه ليش تصارخ . . . ؟ ؟ عيسى : ابوي يقولون الشيخ زايد الله يطول بعمره امر بتوزيع مساكن شعبيه للمتضررين وكل اللي بيوتهم خرابه مثلنا . . . ابو سيف : انت وش تقول . . ؟ ؟ من صدقك تتكلم . . ؟ ؟ عيسى : اي والله ابوي يقولون اليوم مكتوب في الجرايد . . . ابو سيف : خل عنك الجرايد ما تجيب الصدق ابداً عيسى : ابوي بروح اشتري الجريده بأكد لك السالفه . . ابو سيف : أي جريده واي خرابيط . . حق وش تدفع ربيتين عشان اوراق . . يا بوك شف لك أي واحد رامي الجريده عند بيته واقراها من عند احد من اصدقاك . . عيسى : حشى عليه . . يا بوي شو هالبخل . . ؟ ؟ ويرروح عيسى بسرعه داخل ويغير ثيابه المتعفسه ويلبس ثوب ماهو انظف عنها كثير . . . ويطلع . . ابو سيف : وين رايح يا عيسووه . . وين متلبس وش تنتظررى الصابون ببلاش . . . كل شوي وانت مبدل ثيابك من وين بنغسل لك . . . وينصرف عيسى مطنش . . هذربة ابوه الزطي اللي بيموت على الدرهم . . . ................ انتهت الحلقة ثانية نلقاكم في الحلقة الثالثة والاخيرة اخوكم مهند بن عبدالله الدعيج التعديل الأخير تم بواسطة أخطر انسانة ; 14-09-2008 الساعة 01:14 AM |
|
#3
13-07-2005, 03:03 PM
| |||
| |||
| اما الحلقة الثالثة من قصتنا وهي الاخيرة ( وانا اسف على الاطالة ) الحلقة الثالثة.. مرت ثلاث ايام وجت البلديه تسوي فحص للمنطقة وتشوف الاضرار والبيوت . . ووضعت الارقام على البيوت . . حتى تبدا الاجراءات وتعمل اللازم . . .وطلع الخبر صدق . . ووقف ابو سيف البخيل الشغل في تعديل بيته . . وما عاد صار يشتري أي شي . . وكلما قالت له ام سيف هات وهات . . قال : " الله يطول عمر بو خليفة بيعطينا بيوت جديده".. وظبيه بصوب والعالم كله بصوب . . مشغوله بكل شي واعدت البروجكت المطلوب منها باقصى سرعة . . وانشغلت عن سالفة البيت الجديد اللي بيعطونهم اياه . . وكل همها في دراستها . . وفي البيت طلعت من غرفتها . . . ظبيه : ابوي . . ابو سيف : هاه . . ظبيه : راعي الباص يبي فلوسه . . ابو سيف جعل الحيه تلدغه : أي فلوس . . ؟ ؟ ظبيه : الحين صار لك اربع سنين تدفع وتقولي أي فلوس . . اكيد يبي فلوس الباص . . ابو سيف : زين زين بعدين مو الحين . . ظبيه : انا اخر وحده بدفع دايماً كالعاده . . ممكن هالمره في الوقت . . ؟ ؟ ابو سيف : اقولك زين مو وقته خليني اشوف التلفزيون . . . وراحت ظبيه عند امها وما لقتها . . . وعرفت انها اكيد راحت تسلم على حد من الجيران . . . ..................... بعد يومين وصل الخبر لكل الحي وعرفوا ان البيوت بدت تتوزع وكل حد يروح يشوف اسمه وين حطوه من البلديه . . . وسار بو سيف هناك وعرف انهم طيروه اخر الدنيا وعطوه بيت في الرحبه ( حي من احياء ابوظبي) . . . المهم الرجال انهبل وما صدق خبر وقالوا له يجي بعد يومين ويوقع استلام البيت والتنازل عن البيت القديم واستلام المفاتيح . . ومرت ايام واستلم ابو سيف مفاتيح البيت الجديد . . ام سيف : الحمد لله رب العالمين الله يطول بعمر بو خليفه ما قصر ما خلى شي ما سواه . . ابو سيف : اي والله الله يطول بعمره ويخليه لنا يا رب . . عيسى : بس بعيد المكان ابوي . . سيف : اب والله صدق وانا ما ابي افارق جو ابوظبي متعود عليها . . ابو سيف : لا لا احسن هناك عشان ما تأذوني كل شي وتبون السوق . . . ام سيف مستغربه : يؤيؤ ما فيه سوق هناك . . ابو سيف : لا لا فيه سوق تطمني احلى سوق في كل شي زين . . عيسى : ههااااي لعب عليها وصدقت . . . سيف : فاظين والله . . . وين ظبيه . . ابو سيف : بغرفتها . . . ام سيف : يالله يا بو سيف بنروح نتشرى اغراض للبيت الجديد . . ابو سيف انقلب وجهه:وس اغراضه انتي . . وهاللي بهالبيت وين نوديه انتي ووجهك . . انتي بس تبين تخسريني . . ام سيف : هالسامان اللي في هالبيت بس خرابه شو تبيني اسوي به . . ابو سيف : الحين وبعدك ما استلمتي البيت تقولين خرابه عيل لو سكنتي فيه اخافك ما تعطينها وجه ولا ترمسينا مول . . عيسى : ابوي هدي اعصابك ليش معصب . . . وتموا سوالف لين مااذن المغرب بعد كل واحد راح يصلي . . . ................................ ويوم الخميس ابو سيف جالس يحط الاغراض والاكياس في السيارة . . والناس واقفين بجمب البيت عشان يودعونهم لانهم خلاص اخر يوم لهم في هالبيت. . . وظبيه جالسه تعطي احمد وعيسى شنطهم الصغيره. . وهم جالسين يعدلون. . و صل ماجد وكل الشوق بعيونه... ماجد: افا يا عمي وين رايحين . . وين تخلونا وتروحون بليا سلام ولا كلام . . ابو سيف: والله يا ماجد بيتنا مو غريب انته تدله. . يوم تبي تسلم تعال في أي وقت. . ولا الوالده بعدها ما تخليكم . . ؟ ؟ ماجد وهو مستحي : شو هالرمسه يا عمي افا عليك بس . . انت عالعين والراس . . . ومالنا غنى عنك . . سيف : ماجد تعال داخل . . . ودخل ماجد وتم يساعدهم..وهوجالس يشيل ويجيب اغراض من داخل . . كان يتلفت يمين ويسار يبي يشوف ظبية قلبه. . وغزال حياته . . وطلعت ظبيه وما تدري ان ماجد فيه . . وشافها وشافته. . و اول ما تلاقت عيونهم ببعض صدت عنه ظبيه. . وناداها . . ماجد : السلام عليك يا ظبيه.. ظبيه: وعليك السلام.. مايد : شحالك يالغاليه . . . ؟ ؟ ظبيه : اللي تشوفه . . ما شاء الله تنزلت تجي تزورنا . . ماجد : افا عليك يا ظبيه شو هالرمسه اللي تقولينها . . وبعدين لو يرتفع راسي على العالم كله . . انا كلي والله لك . . ظبيه وهي تكلمه بكل غرور : لا ابوي مافي داعي لكل هالمجاملات . . ماجد : الله يسامحك يا ظبيه والله دنياي كلها ولا تجي شي بدونك. . . بس مع الايام بتعرفين ان ماجد صدق يحبك من كل قلبه . . ودخل عيسى .. عيسى : ماجد وينك ياخوي ساعه لين ما توصل . . ماجد وهو منحرج : سوري والله بس لهيت اسلم على ظبيه . . عيسى مبتسم : مادام السالفه فيها ظبيه . . عليك السلام مب شايفين منك خير . . وتموا يساعدون بعض لين ما ركبوا كلهم السياره . . الكل كان يعرف ان ماجد يموت في تراب ظبيه . . والكل يعرف انه مستعد يبيع الكون باللي فيه عشان رضاها . .بس شي واحد كان الكل يجهله . . ويستغرب منه . . الا وهو صد ظبيه عنه وليش نفسها عايفته . . مع انها تقدم لها اكثر من ثلاث مرات بدون ما يمل . . حتى اخوان ظبيه ياما اقنعوها بس ما رضت وتمت معانده ومصره على انها ما تاخذ هالشخص لو شو ماصار . . والسبب مجهول . . وانتهت قصتنا [move=down] [grade="deb887 d2691e a0522d"]اشكر كل من قام بالمرور على الحلقات الاولى والثانيه والذي سوف يمر على الحلقه الثالثه واخص بالشكر اختي ريتال واختي قدساوية[/grade] [/move][b] اخوكم [/b]
مهند بن عبدالله الدعيج التعديل الأخير تم بواسطة أخطر انسانة ; 14-09-2008 الساعة 01:27 AM |
|
#4
13-07-2005, 09:01 PM
| ||||
| ||||
|
العفو ولو :d .. القصه حلوه لكن النهايه ما توقعتها جذي ..على العموم يسلموو ..,, كفيت و وفيت :9:
|
|
#5
14-07-2005, 11:42 AM
| |||
| |||
|
العفو ياغالي ...بس خسااااااااااارة ياريت لو في تكملة للقصة ...حسيت كأني عايشة معاهم .... مشكوووووووووووور اخي مهند على القصة الرائعة ونحن في انتظار جديدك دوماا |
|
#6
14-07-2005, 03:55 PM
| |||
| |||
| [move=down][grade="00008B FF6347 008000 4B0082"]الف الف الف شكر لكن اخواتي ريتال وقدساويه على مروركن وانشالله راح اعطيكن اشياء مفيده اخوكن مهند بن عبدالله الدعيج[/grade][/move] |
|
| أدوات الموضوع | إبحث في الموضوع |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| ** احبك من صميم قلبى احبك ** | وفي صمتي كلام | بوح الخواطر | 3 | 20-01-2008 01:23 AM |
| كلمت احبك احبك احبك ؟؟ مهم للجميع | اسيرة الدمع | المنتدى العام | 11 | 27-12-2007 04:41 PM |
| احبك ........احبك.......احبك وبكل حواس الحب ..احبك | ( أمرؤ القيس ) | بوح الخواطر | 28 | 07-12-2007 09:43 PM |
| قصة واقعية | السراب | القصص والروايات | 7 | 14-10-2007 04:47 PM |
| قصة واقعية | خاطفة القلوب | القصص والروايات | 12 | 28-09-2007 01:37 PM |
