| | |
|
#1 
01-09-2007, 11:30 PM
| ||||
| ||||
 ديوان الشاعرة - مزون المحمد السلام عليكم ،،،، مساائكم .... صباااحكم ....تناااثرت ورود القلب منه سعااادة و فرح صباااحكم ..... مسااائكم ,,,, جميل بجمااال ارووحكم النقيه هي شاعره من السعوديه ،،، قصائدة رائعه بروعتها ،،، اعجبتني قصائدة و اردت ان يكوون لها ديوان عندنا،، الشاااعرة * مزون المحمد * قصيدة ذايع الصيت سديت باب العفو ياقلبي الميت واردمت فوق الحزن "حزني" ردامه ماعاد فيها قول "ياعل" "ياليت" أقفت ضعاين هقوتي بالسلامه سرقت عيني بالنظر ثم لديت طاح الوفا باسباب كسرة سنامه كسرت شوفي ومع دموعي تواريت واثر الدمع بيّن بوجهي علامه يبطي بي الهاجوس لو كان سجيت وتجرحني قولة "ماعليها ملامه" أنا اللي من جمر الهوى قد تغنيت غنيت حرفٍ ذاهبٍ بي غرامه أوااه ياقلبي ترى منك عانيت هانت عليّ دنياي عقب الكرامه ياكثر ما أعطيت واعطيت واعطيت كف العطا عميا ولبست عمامه ماني على ذكر المقفي تشقيت رميت له كاسه وسكرة هيامه ما أذكر إني مرةٍ قد تهاويت دايم وأنا لي بالزعامه زعامه وما أذكر إني بالشعر قد تباهيت اتبع حلاله مجْنبة عن حرامه أنا اللي دايم من دلاله تقهويت شربت فنجاله بعز وشهامه كتبت جزل القاف من حشمة البيت وما ادس راسي مثل راس النعامه وما أذكر إني في حياتي تهنيت حسبي على غدر الزمان وعسامه ياقو طعن القلب إن كان خاويت شخصٍ حقود ويختلف لك كلامه وياشين وقتك كان بالعمر عاديت شخصٍ يودك وأنت تدعي عدامه ماني على هذي وهذي تباكيت الهم فيني واصلٍ بي مرامه ياقلب منت من القلوب المفاليت اللي تراكض بالحفا والندامه مايسكن فنبضك سوى ذايع الصيت فعله ينومس به خواله .. عمامه لو أن قلبي ينحطم منه ماابديت شوق الهوى لو كان للقلب شامه ماني من اللي تاخذ العلم بلفيت آخذ مواثيق العهد من زمامه ذابت هقاوي مثل ضحك الحواتيت وماتت على يد الهقاوي حمامه ؛ ؛ ؛ قصيدة الجرح والعوق طير الهوى ستّل على الحوم بسبوق وعين الهواوي عاجزة عن مناله زادي وشربي صار عندي بلاذوق ولاعاد اذكر في حياتي سهاله ياليت لي قلبٍ عن الحب معتوق مايحكمه بدر الزمان وخياله ماكنت أسابق طلة البدر من فوق ولا اتعبت عيني بالنظر في مجاله مافادني كثر انتظاري مع الشوق ولافادني صبري وزود احتماله ياكبرياء الشمس هي مالها شروق أظلم نهاري عقب ظلمة لياله أنا أشهدٍ قلبي تولع بمخلوق أمسى مكانه خاليٍ من حباله شفت الحزن تسبق بروقه مع الموق مات الحكي والقلب ينبض رساله لامست صدره وانفتق نزف وعروق وزاد الخفوق بسعرته واشتعاله حاولت أضمه ضمة الأم برفوق مير البلا يومٍ صفعني سؤاله يامزون ليه العمر سبتك مسروق؟؟ وليه العذاب بنزلته وارتحاله؟؟ الله يصبرني على الجرح والعوق من قبل قبري تستوي بي رماله التعديل الأخير تم بواسطة *مزون شمر* ; 13-11-2007 الساعة 08:52 AM  |
|
#2
01-09-2007, 11:36 PM
| ||||
| ||||
| قصيدة على الله يوم هان العيد على بحر الدما تبحر سفينة مالها ربان تشيل من العراق أحزاب من شيعة ومن سنّه يعيش الذل يعيش العار يعيش الخاين الخوان بكى نهر الفرات اليوم صدى هالصوت به ونّه على مهلك يعيش الموت والعالم شهود أعيان وبيت الأمركة يستر ملامح صورةٍ صنّه يعيش الموت والظالم يهوديٍ سرى ضميان روى حقده على شيخٍ يضم عروقه الشنّه هدم داره طفى ضوه وقد في جنته نيران صرخ ياأمة المليار وكلٍ شاغله فنّه !! تذوقنا مرار الظلم والنكبات والأحزان نِزَف دجلة مرار الوقت مزارع نخْل ينخنّه بعد موت وسجن تشريد ضاعت هيبة السلطان فقد شعبه فقد قصره وشاف الموت ماعنّه سقى الله وقته الماضي عزيزٍ ماحدٍ له هان تخاف الصهيّنة عزمه تخاف بكلمةٍ منّه على الله كسرة الخاطر على الذله على الخذلان على الله يارغد يرحم عزيز القوم ماكنّه على الله يوم هان العيد من بغداد بالإعلان على الله ياشجاعة قائدٍ ماخيّبت ظنّه رسالة واضحة: حكام ماتفرق عن الخرفان يرددها العميل وكل من يعزف على الرنّه جهل منهو بغى يجهل وتعب من حاله الفهمان قضية دين ياعالم عليه الحرب منشنّه !! ؛ ؛ ؛ قصيدة هالعباية فضيحة!! اجتاحت عاصفة الموضة كل شيء حولنا حتى إنها مسّت صلب حيائنا وحشمتنا إنتشرت في الآونة الأخيرة عباءة جديدة تسمى عباءة الفراشة .. من أسمها يتضح موديلها وكل ذلك من تزيين إبليس نعوذ بالله منه .. يقول الله تعالى متحدثا عن إبليس (وَلأُضِلَّنَّهُمْ وَلأُمَنِّيَنَّهُمْ وَلآمُرَنَّهُمْ فَلَيُبَتِّكُنَّ آذَانَ الأَنْعَامِ وَلآمُرَنَّهُمْ فَلَيُغَيِّرُنَّ خَلْقَ اللّهِ وَمَن يَتَّخِذِ الشَّيْطَانَ وَلِيًّا مِّن دُونِ اللّهِ فَقَدْ خَسِرَ خُسْرَانًا مُّبِينًا (119) يَعِدُهُمْ وَيُمَنِّيهِمْ وَمَا يَعِدُهُمُ الشَّيْطَانُ إِلاَّ غُرُورًا (120))سورة النساء إليكم هذه القصيدة والتي نبعت من مشاهدة لتلك العباءة لفتاة وسط السوق عسى الله أن يهدي نساء المسلمين للتمسك بالحشمة والحياء .. . أهب ياوقتنا الحالي أهب ياهو زمان أقشر تضاعفنا الحقود اللي يدس السّم بالكاسه يصمم سترنا غربي عباية للأسف تُنشر مثل هاك الهشيم اللي وطى فيه اللظى وداسه حشى مانلتفت يمه يموت بحقده ويُحشر حثالة فكر مايدري عن الإسلام وش ساسه فراشة ترتديها البنت وكلن يمها أشر يسميها العرب موضة .. جنون الموضة براسه!! تمريّع وسطها أنثى تطب السوق ثم تدشر شظايا بالنظر تفتك مريضٍ فاقد إحساسه نست زينب / نست خوله وبالنيران هي تبشر حشى ماهي بمحسوبه من الإسلام أو ناسه لقينا بالعرب شلة تغذا فكرها بالشر تسوم الدين بالتدليس (فضايح زعمها دراسه)!! سقانا هالزمن سمّه كشف عن نابه وكشر فقدنا صوت هيئتنا فقدنا الحق ونبراسه التعديل الأخير تم بواسطة *مزون شمر* ; 13-11-2007 الساعة 08:56 AM |
|
#3
01-09-2007, 11:40 PM
| ||||
| ||||
| قصيدة هيبتك .. عِزة تحت النجوم اللي بعالي المدارا تحت القمر بالنصف من شهر شعبان كتبت قافي من دموعٍ تبارى عليك يالمحبوب يا اعز إنسان عشت الهوى وياك مثل الحيارى صرت اتجرع عذب حبك بكيسان كتبت قافي ثم ثنيته مرارا واكملت لك من قاف الاشعار ديوان لك هيبةٍ تملا ضلوعي وقارا ولك كلمةٍ ترجح على كل ميزان لك عزةٍ تذبح قلوب العذارى ولك فزةٍ ماهي على طير حوران لك دنيةٍ تزهر قفار الصحارى ولك نظرةٍ تروي ظما كل عطشان رميت سهمك بالضلوع الفقارى واعلنت حبك داخل الروح اعلان ؛ ؛ ؛ قصيدة رفعت الصوت يارُحماك تحدر دمعي من عيني .. وقف قلبي بونة آآآه رفعت الصوت ياربي .. رفعت الصوت يارُحماك على منهو سكن فيه المرض واعياه ثم اعياه مريضك ياإله الكون على بابك .. على مشفاك يكابر بين وناته على صبره على شكواه وفي عز الألم يضحك وهو في داخله ينصاك يصَبر بالرضا نفسه ألا يا هالصبر ماقواه تصبّر والصّبر نعمه يجازي بالصبر مولاك ألا ياربي ترفع عنه مانزَلت به واضناه ألا يالله تزيل الكرب طلبتك رحمتك ورضاك ترى مالي بهالدنيا سوى قلبه وانا مضناه دخيلك ياإله الكون .. تعافي من زبن بحماك أهي أمي .. أهي دمي .. أهي كون الحياة أحياه دعائي ياشموع الدار عسى رب السما يرعاك مسى دارك بلا نورك .. مسى صرخاتي بيُماه كفوفي تحضن ثيابك .. أشمك .. ألتفت ماالقاك عسى بيت(ن) فقد نورك يشوفك من عقب فرقاه وعسى ربي يعين القلب .. يعينه من بعد فرقاك وعسى في رحلتك خيره تداوين المرض بدواه وترجع ضحكتك عندي عقب ماهي على ذكراك التعديل الأخير تم بواسطة *مزون شمر* ; 13-11-2007 الساعة 08:58 AM |
|
#4
01-09-2007, 11:44 PM
| ||||
| ||||
| قصيدة مزون حنيّه سألت الوقت يخبرني عن اللي ساكن(ن) بحشاي دخيلك لاتروعني تقول اليوم به سيّه تراني مذهبه قلبي ولا ادري وينها دنياي غشتني ظلمة فراقه عقب ماكان لي ضيّه رفعت الصوت أنادي له رجيته يلتفت لنداي سمعت الصوت يتردد عرفت ان الصدى ليّه وقف شوفي على الوجهات وضاعت بالدروب اخطاي ودموع العين همّاله على الخدين ماريه جفيت الناس من شانه وعززت الجفا بشفاي ونطقت بكلمة(ن) وحده ترى مابالبشر زيّه عريب الساس قوي الباس سنافي(ن) سديد الراي أمير القوم يساهر دلته في نارها الحيّه يشع بناظري ضوه ليامنه وعدني "جاي" ألا يافرحة الدنيا ليامن حلّ طاريّه يسوق لغايتي روحه يسلمها وسط يمناي أشاور باصبع(ن) واحد ينفذ هالأمر ميّه عجز وقتي عن وصاله وذكرني بصوت الناي تذكرت الهوى عنده شعر وابيات عفويّه (دخيلك) مادخلت إلا على روح(ن) وسط منفاي (دخيلك) لاتهد بيوت حمتنا في ذرا الفيّه (دخيلك) لاتسوق همومك لغيري ترى مبداي اضمّد جرحك النازف واداوي حرة الكيّه انفدا راسك الغالي وانفدا وطيتك "مغناي" وانفدا حظك العاثر وانفدا روح مبليّه انفدا عمرك الوافي وانفدا صبرك بشكواي وانا فعلي مثل قولي فدتك مزووون حنيّه عقب هاك الجفا وقتي يحد الروح لين اقصاي عقب لبس الذهب هاليوم رميت اساور ايديّه ألا يالله ياربي تصبرني على بلواي أعاني لوعة الفرقا عقب أحلام ورديّة ؛ ؛ ؛ قصيدة على جمر الحنايا ندهت الليل يشب النار.. يصحي نايم الملّه يجدد مالك بقلبي من الوجد وتباريحه على جمر الحنايا يالغلا.. جهزت لك دلّه يفوح ابها النفَس والبن وطعم الهيل مع ريحه قضيت الوقت مع قلبك .. قضيت الساعة بفلّه يذوب من الوله صدر(ن) يشيل الهم وتزيحه سهيت استرجع الذكرى .رجعت اشفق على الطلّه رجعت وللأسف وقتي .ترى مداته شحيحه عشقت ومن عشقت بعيد .قلبي بالهوا عَلّه على كف الظروف نعيش .ظروف(ن) ماهي مريحه عشقت اللي حلف يمشي على دربي ولو ملّه يمل الدرب ويبقى القلب على دينه وتسبيحه عشقت اللي سكن بالروح ..والأعماق ترحل لّه عطاني الحب في ليل(ن) مضوية(ن) مصابيحه عطاني من الرضا دنيا .. يضيق لضيقي لو كَلّه عطاني من الجنون فنون .. تغنيني تصاريحه تغادر ونته روحه .. صدى من أضلاع معتلّه تعانق ونته روحي .. تزيد العشق وتوضيحه سهرت الليل مع نبضك .. لقيت الأرض محتلّه رجعت لدنيتي والهم تلعبي مراجيحه التعديل الأخير تم بواسطة *مزون شمر* ; 13-11-2007 الساعة 09:02 AM |
|
#5
01-09-2007, 11:49 PM
| ||||
| ||||
| قصيدة جنوني جنوني لو تعرفه يوم .. جنون الطفل في ملهاه جنون(ن) ينسف الدنيا بصرخة من تعابيره جنوني لو تحسه يوم تعيش العمر في رجواه جنوني نبعك الصافي .. تذوقه مع تباشيره جنوني هو هواك وعشقي اللي عشت انا وياه كتبته للبشر قصه .. كتبته للهوى سيره جنوني شوق يغرق بي على شاطي بحر دنياه أعيش الحب في صبحه .. وفي ظلمة دياجيره أحبك كثر مايملك عزيزين الشرف والجاه أحبك موت ياقلبي .. أخاف أموت م الغيره بدوية .. غيرتي عميا .. تهد القلب ثم تنعاه أموت .. أحيا على حبي .. واسامح في معاذيره أحبك كثر ما يطري على العاشق طواري الآه وأحبك كثر ما يرقب نجوم الليل سهّيره أحبك كثر ما يبكي حزين(ن) فاقد(ن) مضناه فقد صبحه .. فقد ليله .. فقد طلة تناويره ملكت الروح هي والقلب ياجرح القلب ويّا دواه عجزت أوصف غلا عمري .. عجزت أرسم تصاويره غرامك يسري بعرقي .. يوقف نبضي ويرعاه ومالي حل كود أقول الا ياربي الخيره عساني مانحرم صوتك .. عسى روحي قبل فرقاه تروح برحمة الوالي .. على سنة تدابيره ؛ ؛ ؛ قصيدة قسوة غيابك يلوح بهالسما غيم(ن) تروّع شوفة بروقه مع أنفاس المطر ترحل رياح العشق لديارك تبلل بالمطر ثوبي وسط نظرات مسروقه حضنت بداخلي خوفي وأنا ملهوفه لأخبارك طلبت القرب من قلبي عطيت القلب وعروقه على هم انتظاري لك توافيني بإعذارك تساءلت الدروب اللي على ممشاك مطروقه سرى صمت الدروب ولا إجابات(ن) لمسيارك تساءلت المكان اللي حضن آهات منطوقه لقيت الحزن يصرخ به صدى هالحزن بأسوارك تساءلت الزوايا كيف يهجرها على روقه لقيت من الظلام أشباح عقب ماكانت أنوارك تساءلت الزمن مره يكف الغدر عن ذوقه لقيت الغدر من شيمة زمان اليوم بأسرارك تساءلت القصيد اللي تركته لي بحروقه يحن القاف على لحنك يلين القاف بأفكارك ألا ياقلة الحيلة دمع عبرات مخنوقه تحاصرني هموم الليل وانا من جملة أخطارك ألا ياقلة الحيلة خطايا الوقت مسبوقه خطايا والخطايا روح على يمناك ويسارك ألا ياسيَد العشاق يذوب العشق من شوقه ويذوب من الهوى قلب(ن) عرف جنته في نارك التعديل الأخير تم بواسطة *مزون شمر* ; 13-11-2007 الساعة 09:05 AM |
|
#6
01-09-2007, 11:53 PM
| ||||
| ||||
| قصيدة ظروف الوقت يشح الوقت بوصالك وتبقى للظروف أحكام وانا والله ياعمري ظروف الوقت تشقيني سمرت الليل بغيابك أخط النزف بالأقلام على ذاك الكتاب اللي رويته دمع من عيني حسبت أن الزمان يجود ونقضي باقي الأيام عبس وجه الزمان اللي بصكاته يجازيني طفى ضو الليالي عقب فرقى فارس الأحلام بقايا الليل في فكري .. وصدى الذكرى يسليني يلوح بناظري متن السحاب وبارقه قدام عرفت البرق يم الشرق .... ياكم الشرق يغريني تربع بالحشا حبك بنى بيته شعر وخيام إذا جيته يهلي بي .. ويوم أقفي يحييني كتمت بخافقي نبضك عرفت إن الفرح أوهام يموت الحب في مهده .. معاليقي تعزيني عرفت الحب مايكمل عرفت إنه وله وهيام ينابيع الحزن صدري على مضماي ترويني تراك لخافقي سيّد حنايا القلب لك خدام وأنا وأن عشت في حكمك عرفت الحكم يرضيني نعم وبدنيتي سيّد يانبض الشعر والإلهام نعم كل القوافي لجل عينك تحتمي فيني نعم سِيدي .. نعم سِيدي .. تسيّد خافق(ن) بك هام تسيّد ما أحد غيرك قدر باسمي يناديني قسمت العمر لعيونك .. بصمت القلب بالإبهام عرفت النور في عينك على الظلمة يقديني تمايل قلبي بقربك بليل من الحفل بأنغام عشقت من الطرب لونك على لحنك تغنيني سقاك الله ياعشق(ن) يعيش بداخلي أعوام سقيتك من غلا قلبي ومن نبعك تساقيني رعاك الله يا عشق(ن) وعدته دوم ماينضام منامك بالعيون .. ومسكنك في راحة يديني ظروف الوقت تبعدنا وتبقى للظروف أحكام وأنا وأن عشت في بعدك .. خيالي لك يوديني ؛ ؛ ؛ قصيدة صباح ال : جرح / عيد بكيت الجرح صباح العيد عرفت العيد بجراحي صباح الخير يادموعي .. صباح الجرح واعياده صباح اللي هجر داره يخايل كل من لاحي تذكَر عيده الماضي .. يقض الجرح مرقاده يحسب ان البحر عقبه غرق به كل ملاحي يحسب ان البشر تسأل عن اللي فطرته عاده يحسب ان السما تفقد هذاك الحر لاصاحي حمام القنص ما تشبك حرار القنص على هاده هقيت من الرجال اللي لهم مضوى ومسراحي مزبنة الدخيل شيوخ تحل الصعب بركاده هقيت وخابت الهقوة على من بالجفا راحي بقى لي للأسف منهم طواري الهم مرتاده عرفت اللي يعين الوقت ويقتل طلة افراحي وعرفت اللي بأعيادي عطاني ثوووووب وقلاده تساوت في نظر عيني رماح الوقت برماحي تساوت في نظر عيني طعون الرمح وضماده تساوى في فضا عمري ظلام الليل ومصباحي على وسع الفضا هاليوم يزيد الهم وشداده وقفت اقول في نفسي خذي دنيتك وارتاحي خطايا الوقت ماترحم على الضربات معتاده التعديل الأخير تم بواسطة *مزون شمر* ; 14-11-2007 الساعة 03:09 PM |
|
#7
02-09-2007, 12:03 AM
| ||||
| ||||
| قصيدة نوض سدير هذان البيتين التي قدمتها الشاعره نوض سدير الى مزون هطلتي كنك غيوم عطاها جاوز المعقول وفيك من الصفات الطيبة يالغادة اندرها أبد والله مالقى مثل قلبك ياشبيه اللول بياضه لاغشى قلوب الاوادم صعب يخسرها وكان هنا نبض الشاعره مزون رد على الشاعره نوض سدير هلابالشعر يانوض الشعر بالفعل ويّا القول عدد ماخطت الأقلام في أبيض دفاترها هلا باللي تعزف القاف على لحن الوفا الموصول هلابك ياقصيد(ن) ينتشي بالروووح لآخرها ترى والله يشرفني كلامك والغلا مدبول على وضح النقا قلبك سليلة مجد يفخرها على صوت القصيد شموخ يشرّف روحة المرسول تقول إن الحروف شيوخ مثل جاهه على اثرها نِرِد نهر القوافي نرتشف من لذة المعسول أحد يغرف على هونه وأحد يتمنى يشعرها ياكم اللي على جاله يلاقى شفه المجمول يغني قافه اللي من بنات الفكر ينثرها وياكم اللي عناه الوقت عجز لايجني المحصول يناظر من يمين يسار والقيفان يطمرها هنا يبقى الشعر فينا أمانه مالها مسؤول سوى منهو يصون الحرف والأخلاق ينظرها التعديل الأخير تم بواسطة *مزون شمر* ; 14-11-2007 الساعة 03:12 PM |
|
#8
02-09-2007, 12:07 AM
| ||||
| ||||
| قصيدة سحايب دمع على كثر الجروح اللي بقلبي وخافقي مشتاق ضواني ليلي وقلبي تحزّم ثورة أشواقه صرخت بداخلي صرخه تلوذ الروح بالأعماق تموت الصرخة بجوفي وهو غايب بأعماقه تجول بخاطري كلمه تباري دمعة الأحداق تغارق صوتي بدمعي بوقت(ن) جفّت أحداقه جرحت الحب بغيابك طعنت الروح دون ارفاق سلبت شفاهي البسمة خذلت الرمش برفاقه توقعتك تجي تسقي عروقي بالهوى ترياق عروق(ن) في حنايا صدر بين يديك ترياقه توقعتك تجي تغرق حياتي بالهوى إغراق توقعتك تجي تمسح دموع عيون غراقه توقعتك تجي تطفي لهيبٍ بالحشا حراق تزايد ناره ف بعدك يزيد الجمر بإحراقه توقعتك تجي نقضي بقايا عمرنا بعناق تجيني ارتمي بحضنك بليل يزين بعناقه توقعت الغلا يسري بدمك دايما" ينساق وتوقعت الوله في داخلك واقف على ساقه توقعت الهوى في سلمكم ذوق وأدب وأخلاق ويبقى الشوق بأرض الحب ويبقى الحب بأخلاقه توقعت الوفا منّك مثل نهرٍ علي دفاق توقعتك تجي بإخلاص مع أشواق دفاقه توقعتك تجي بيدك قصيدة حب للعشاق حسافه ياهوى قلبي : خذلت عيون مشتاقه حسافة ياهوى بالي نقضت العهد والميثاق حسافه ينهدم هالحب رغم عهده وميثاقه بنيت من الوهم دنيا ألين أصبح فضاي إشراق وقفت أسترجع الذكرى بليالي كانت إشراقه بكيت من الصدود اللي سكن فيك وبقى خفاق رفع رايات مكسوره دفن أرواح خفاقه تعبت أبقى بليدة فهم اخط النزف بالأوراق تعبت أشكي تعبت أبكي بدمع(ن)بلل أوراقه تعبت أبقى أسيرة وقت تعبت أطلب رضا بإشفاق تعبت اطلب رضا قلبك ونفسي دوم شفاقه حزن مدري .. حزن مدري .. حزن مدري .. حزن سبّاق حزن يقضي على روح وليالي الجرح سباقه وعلى كثر الجروح اللي بقلبي وخاطرك بفراق ضواني ليلي وقلبك توّلم يعلن فراقه غفيت وهالحزن صاحي صحيت وهالحزن براق تخيل حزني الطاغي سحايب دمع براقه !! ؛ ؛ ؛ قصيدة جنون الأماني تمنيت الألم فيني .. بروحي ماهو بروحك تمنيت احتضن جسمك واعانق كل آلامه تمنيت الحزن ثوب(ن) اشيله من على سفوحك واقدم لك بداله ثوب ضافي تزهي اكمامه يهون الهم في صدري ينوح ولا أرى نوحك يهون الدمع بي يسكن .. وتنسى الهم وايامه ألّم الهم ويّا الهم .. ويبقى شوقي لبوحك ويبقى دفّْترك قلبي انا صفحته واقلامه وتبقى ضحكتك عندي براءة تعزف جنوحك تطيح بضحكتك دمعه تعيد الوقت واحلامه تمنيت الفرح ليله تداوي علة جروحك نتوه بحبنا لحظه .. نودع عالم اوهامه تمنيت الفرح عطر(ن) اشمه من شذا فوحك تمنيت التقي وياك نعيش الحب وهيامه وتمنيت الألم فيني بروحي ماهو بروحك تمنيت احتضن جسمك واعانق كل آلامه التعديل الأخير تم بواسطة *مزون شمر* ; 14-11-2007 الساعة 03:16 PM |
 |
| أدوات الموضوع | إبحث في الموضوع |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| ديوان الشاعرة عابرة سبيل | *مزون شمر* | ديوان الشعراء | 11 | 01-12-2008 11:24 PM |
| ديوان الشاعرة نوض سدير | *مزون شمر* | ديوان الشعراء | 34 | 28-11-2008 11:48 AM |
| ديوان الشاعرة كبرياء شمريه | *مزون شمر* | ديوان الشعراء | 12 | 10-06-2008 08:45 PM |
| نداء عاجل الى مزون شمر | شفايف كرز | الترحيب و اصدقاء عبير | 1 | 23-05-2008 01:13 PM |
| مزون شمر وعام من الأبداع | الأصيل | الترحيب و اصدقاء عبير | 20 | 26-11-2007 07:34 PM |
