ديوان الشاعر ثامر بن شبيب

السلام عليكم

اعضاء منتدانا الغالي،،
مسائكم ,,,,, صباحكم ,,,,, جميل

الشاعر ثامر شبيب




شاعر مميز شاعر الفراق شاعر جعل لشعرة وجود بكل مكان

رغم انه مقل في ظهوره بالساحه لى انه جعل اسمه موجود في قلوبنا

يقول عن نفسه / انا شاعر احاول اكتب كل ماحسه


له ديوان صوتي اسمه ليلة افراق







قصيدة هذي حياتك .. وانت حر بحياتك للشاعر




لحظه قبل لا تطلب البعد وتغيب
وتنهي معايه مرحله من حياتك
أخذ الهدايا والصور والمكاتيب
دامي خسرتك ما أبي ذكرياتك
يمكن يكون فراقنا رأي مصيب
خيره .. كتبها الله جتني وجاتك
مع اني ادري انت ماعنك تجنيب
كنك موصيني وقاضب وصاتك
رح واترك بقلبي لك أربع معازيب
معزتك طاريك حبك غلاتك
وإن شفتني أجمع شتاتي .. ماهو عيب
باكر مع الأيام تجمع شتاتك
وإن شفتني شايل جروح معاطيب
باكر يصير الجرح أبرز صفاتك
أكبر مصيبه في زمان العذاريب
إني أحبك وأنت حبك لذاتك
الطيب لو إنك تجازيه بالطيب
ماكان تالي الوقت هذي سواتك
يا صاحبي لا صرت أغلا الأصاحيب
لا تزعل بكيفك وتطلب رضاتك
أنا حبيبك مبعد الشوح مانيب
من ضيع جهاته .. يدور جهاتك
إن كان ماعديت روس المراقيب
ماني كفو أصلا أنام في عباتك
شفني مقدر عند عكف الأشانيب
مانيب من تومي عليه بعصاتك
رح للفراق إللي تركنا مصاويب
شمت اعداتي قبل تشمت أعداتك
الله معك .. رح وين ماودك تغيب
هذي حياتك .. وأنت حر بحياتك

؛
؛
؛

اكره اثنين





قالوا امدح شيخ والا امدح امير
لجل تكسب من مديحه فايده

قلت انا في خير واحوالي بخير
ليه ادور شي ماني رايده .؟

ادري ان مال الكبير الا الكبير
الرجال تقاد والا قايده

اكره اثنين : المنافق والحقير
تستقل طيب الرجال الرايده

ان مدحت امدح وانا وجهي سفير
مدحت للحق ماهي سايده

وكانها ماجات من قلب وضمير
مدحتي ذمه بحقه كايده

وش علي ان صاد له طير يطير
لاهو بطيري ولاني صايده

من خلقن الله احب اكون غير
ما احب اكون حاجه زايده

الفقر ماعذرب اخلاق الفقير
في السنين الحاضره والبايده

في الزمن اشياء تعني لي كثير
التمام الشمل حول المايده

ومنظر البسمه على الطفل الصغير
في نهار العيد يوم تعايده

قلتها وعذري يصير اللي يصير
كل راس يرتخي لوسايده

انتبه وياي للبيتالاخير
اسمعه مني ولاني عايده

تدري وش معناة رجال حقير
من يصاحب رجل لجل الفايده

؛
؛
؛

ولدي

لا ملامه لا تشره لا عتاب
ماغدى لك شي مفروض يغدي

لا تحاسبني على اسباب الغياب
في يدك ماصار ماكان بيدي

لو رجعنا وابتدينا بالحساب
منتهي وياك من قبل ابتدي

كنت اشوفك غير لين القلب ذاب
في هواك وصار ماهو بجسدي

وقتها لو لي ولد عمره شباب
يمكن احبك كثر حب ولدي

لكن اللي غاب .. يوم النور غاب
شي يحداني عن ايدينك حدي

تذكر اللي صار يا مال الذهاب
ليلة ماجيت وامسيت اوحدي

لا تغرك بسمتي وزين الثياب
داخلي ضايق من الوقت الردي

السؤال اللي بقى ماله جواب
ياكثر مامر على الجرح الندي

يا معودني على طرد السراب
وشتبي فيني اليا ضاع جهدي ؟

صرت انا وياك نشبه للسحاب
لا تجمعنا تساقطنا بردي

السحاب اليا تساقط بالاهضاب
يحيي القاع الحزين الجرهدي

بس حنا .. لا تساقطنا عذاب
نكسر القلب الكبير الاجودي

لباس العمامه

سم بسم الله ياطفل تحلم
وارتفع للعز ياراعي الزعامه

اقضب الهرجه وللموعد تولم
قبل ترقا هامة من فوق هامه

صاحبي لاصرت ماتعرف تعلم
قبل تلحق لحيتك شرها وملامه

ودك الرجال لامنه تكلم
يثبت افعاله على موجب كلامه

سالفتنا غير عن قلب وتألم
لاشكى معذور من لاهب غرامه

سالفتنا ضربة استاذ ومعلم
شتتت فكر التلاميذ ونظامه

لكن اسمع قبل اقول اسلم وسلم
كل رجال وله بصمة ابهامه

صاحبي بالحق لاتسكت تكلم
لاتحسب حساب لباس العمامه

خراب بيوت

ياحي والله هذاك الصوت
اللى اتصل امس مشتاقي

لحظة غيابه تجيب الموت
وشلون لو ينوي فراقي

ياراكب اللى يسمى حوت
اقصاد .. والحال بك ضاقي

اركب نبي .. نصيف بيروت
لعيون مبرومت الساقي

تدري وشنهو خراب بيوت
غيابها .. وقطع الارزاقي

من عقبها كني بتابوت
ماعوض غيابها الباقي

اللى اسمها بالحشى منحوت
من حبها داخل اعماقي

تقول : ان الليالي تفوت
وانا انتظر لك على اشواقي

ماشفتني .. كاشخه بالبوت
امشي .. بثقة واحد هاقي

الهيبه ماهي بلبس بشوت
غيرتها بعين عشاقي

من هيبتي لابست لي كوت
هيبة ملك .. مر سواقي

قلت : اسكتي والوعد مثبوت
بكره اطفي الشوق بعناقي

فديت دم الشفايا التوت
الموت الاحمر ولا انذاقي

خليط سكر على ياقوت
صفت ثناياك براقي

ياصاحبي .. اركب لبيروت
لعيون مبرومت الساقي

نمشي على الرجل ولا الحوت
ماتفرق ان صرت مشتاقي

قصيدة عبس

ياوقت لاتلبس مواعيدنا لبس
كم لي وانا خايل واخايل واخايل

الكسر حديته على الجبر والجبس
والدمع حديته على الخد سايل

فل القيود وبطل اقفولة الحبس
خل الكويت تعايد اليوم حايل

اللي تشاور راعي اللبس باللبس
تبا تماريبه بنات الحمايل

ام الترف والمبسم السكر الدبس
عالت على قلبن لها الحب شايل

من يوم ماجتني تحبس الهوى حبس
تامر علي ولسانها حيل طايل

وشلون تامرني وانا من بني عبس
لو يحكي التاريخ فيها قبايل

رح قلها لو ريقي من الضما يبس
ماني بدور بالرفيق البدايل

كان الزمن مايل معي وخاطره عبس
ترى الزمن ماهو على طول مايل

بكره تغادر ضيقة الصدر والكبس
باب الاصايل ينفتح للأصايل

تلقا اليدين مكسره قفولة الحبس
وتلقا الكويت مصافحه يد حايل

قصيدة غرتني الدنيا

غرتني الدنيا وانا اصبحت مغرور
وحطمت قلب اللي غمرني بطيبه

اصبحت عايش خالي احساس وشعور
ماعاد افهم وش حبيب وحبيبه

غادي عن الدنيا لي ايام وشهور
صارت حياتي في عيوني غريبه

ظلام لف الكون ماعاد به نور
غربه خذت ثامر من ايدي نهيبه

بنيت بيني وبين نفسي انا سور
ابعدت نفسي وهذي اكبر مصيبه

ترى الذي مايسمع الراي والشور
كلمه تودي به وكلمه تجيبه

وانا غلطت وقلت ماني بمعذور
ومن يعترف بالحق محدن يعيبه !!!

وياصاح سامحني اذا جيت بقصور
مثلك يسامح لازعل من قريبه

لو منت غالي كان ماني بمجبور
اجي و ادور عنك من بعد غيبه

اقسم برب البيت ان لزمن دور
واني بدونك عشت حاله صعيبه

انام ضايق اصبح الصبح مقهور
تخيل ان راسي بدا فيه شيبه

المسأله ماهي قصايد وجمهور
ولا هي بعد قصة كرامه وهيبه

مسرور من هالناحيه حيل مسرور
مرتاح في وضعي كذا ومهتني به

ماهوب اكبر همي اصير مشهور
كلن بياخذ من كتب من نصيبه

بس انت ارجع لي وانا اكون مشكور
واقلب يدي وبوسها وابتدي به

يومن معك مافيه شاعر وجمهور
مافيه الا بس حبيب وحبيبه

قصيدة تومي بيدها

الله واكبر ياهذيك المواعيد
ايام ماكانت تحاتي وعدها

من قبل لا تكثر عليها المناقيد
وتلبس خطاياها عباه لجسدها

العام كانت حلم ليل الصناديد
من الحيا ماتجاوب اللي نشدها

واليوم صارت تصنع لكيدها كيد
تعلمت وشلون تتقن نكدها

تومي بيدها لواحدن واقف بعيد
تحسبني ازعل يوم تومي بيدها !!!

ماتدري ان فراقها كنه العيد
ماني بميت من غلاها بعدها

القلب لو شوقه بعد غابت يزيد
ذبحت قلبي في يدي لو فقدها

ماعادها كفو السهر والتناهيد
مدامها خانت مبادي عهدها

قولولها وانكانها شيخة الغيد
تستر عن عيون المناظر نهدها

وانكان اصبح عذرها حب تجديد
مع موظة يخذل مطرها رعدها

لا والله الا زادة حبارة الصيد
وطيور ماهدة بيكثر هددها

العلم بين مايبي زود تأكيد
واضح وضوح الشمس للي شهدها

الشمس تطلع شرق يوم الله يريد
حكمه من الله ماطلعة من وحدها

الله أمرها تنور الكون تحديد
وبعض البشر مع كل هذا تعبدها !!!!

يعني خلاصة هالحكي والتشاهيد
قولولها من قبل تفقد رشدها

انكانها مشتاقه لواحد بعيد
تروح له .. ماهوب تومي بيدها !!!!

؛
؛
؛

قصيدة توك تجي

منك السموحه والعذر ياضنيني
النفس طابت لين قلبي عذرها

ماعاد باقي شي بينك وبيني
وانكان لك حاجه تعال اختصرها

اخذت من عمري حلاوة سنيني
كافي على قلبك اليامن ذكرها

غصب الفراق يصير ماهو بديني
اقدار مكتوبه ولاحد(ن) قدرها

توك تجي .. واتقول انك تبيني
وين انت يوم النفس تشكي كدرها ؟؟؟

كنت اترجى تتصل يوم فيني
كنت بحياتي غير .. قبل اتهجرها

خلاص لا تتعب قدمك وتجيني
كنت احترم جيتك .. وصرت احتقرها

سبحان من خلاك عادي بعيني
من عقب ماكنت انت تسوى نظرها

قصيدة حكاية اسمه الثاني

اببعد والطريق اللي يودي ياعساه يجيب
بدالي واحدن تلقا معاه اللي تمنيته

مدامك شايف الفرقا امل خيره وراي مصيب
انا حاضر على امرك وامرك ماتعديته

انا الغلطان واستاهل جفاك ومنك التجنيب
على فكره ترى ماهمني بعدك وتشتيته

كثر ماهمني شخصن بداية بعده التعذيب
قسم بالله مامثله من الاجواد خاويته

حسافه يالحبيب اللي من يديني زمان قريب
ترك دنياه من شاني ولجل دنياك صديته

هذاك اللي خلق ربي حياته كلها من طيب
تضيق بعيني الدنيا واشوف الخير لاجيته

تخيل من تعرفنا ولامره لحقته عيب
ذكرني والمصيبه ياكثر ما انا تناسيته

كبير الفرق مابينك وبينه ولسؤال مجيب
اذا ردت على فعلك وصيته وفعله وصيته

علي لاضاقت الدنيا وجيتك عن عيوني تغيب
وهذاك ان ضاقت الدنيا وجيته فاتحن بيته

كلامه .. فلة حجاجه .. سلامه لابدا الترحيب
كبير بكل حالاته .. انا وشلون خليته !!!

عطاني كل ما اطلب بلا منه بلا ترتيب
على اقصاه يمكن الف مره بس حديته

تركته ايه ما انكر وعذري دايم التجريب
غريبه قصتي وياه والاغرب كيف جافيته !!

اشوف الدنيا صغيره بعيني اوكره التغريب
اضيع شهور عن دربه وارد انكان دليته

اجيه استسمح ارضاته واطالب حقي التقريب
انادي اسمه الثاني عشان ارضاه ناديته

حكاية اسمه الثاني بسيطه ماتبي تحسيب
عطاني اسم غير الناس بلحالي وسميته

انا متأكد ان جيته ودمعي سايلن للجيب
بتصغر كل هالدنيا مثل ماضقت وابكيته

كبير بقلبه بحبه كبير ولا ملاه الشيب
يقرب كفه الطاهر لكفي كان مديته

اذا الله قدر ورده مثل اول وصار قريب
عسى الله كل محتاجه يخليني ان خليته !!!!!