العقل بيت شيوخ والحلم جاسوس للنفس يقطع من تركها ثواني
خذني وطلعني ولو الهوى كوس أبا أتنفس شي صافي وهاني
داخل تصادم فكر ومزاحم نفوس على فتافيت الغوى والغواني
في اللوبي هذا كل شي ضايع ومعكوس ما كن في هالكون رب وأماني
أثاثه الغامق وتصفيفة الكوس تدل على ذوق راقي وداني
شفهم وشف كيف الفشل يجعل الروس أشياء كمالية ما بين الأذاني
وشف كيف هذا ثمل ويعثر ويدوس على مسمى جدّه الأولاني
وشف كيف هالشايب برغبته محبوس تحت شعار إن آخر العمر فاني
أحس عنده عيله وبنت عروس تخجل من أبوها كثير وتعاني
وشف هالجمال اللي مدثّر ومحيوس مثل الكلام اللي بليا معاني
فتاة تعرض جسمها الغض بفلوس ويبيعها فاليوم عشرين زاني
وشفت هالثنين هناك؟ تراهم جنوس رجال.. بس رجال من نوع ثاني
ضحايا نفط وقل طاعه وناموس والأم كانت طيش والأب أناني
كل الزوايا طافحه قبح ونجوس تسبح وفالركن الأخير المواني
واحد يغني وعنده حثالة جلوس كأن ما في هالحياة إلا أغاني
يا وخز قلبي وخزة الجرح بالموس يا عالمٍ ما فيه حلم وتفاني
في هاللوبي ما فيه ريّس ومريوس الكل بايع نفس والكل جاني
والكل عنده عذر واهي ومدروس لو قلت ليه أنت كذا؟ قال أعاني
أنا اللي أعاني من القوس إلى القوس هذا ما هو بجوّي ولا هو مكاني
بركض وأبي يركض معي ألف فانوس إلى صباحات الغلا والتفاني
روّح معي والواقع أحيان كابوس وأنا ما أحط اللوم على زماني
أحمد ربي كل ما دق ناقوس وأعرف حدودي وأستحي من كياني
وأصمت ليا جا للحكي روس وعسوس وأضحك ولو وجهي من البكي حاني
لو كل شي محسوس بالفعل ملموس طلّعت آخر جرح بين المحاني