كان سلمان توه واصل من العمل ..
سلمان غير متزوج عمره 33 سنه ابوه توفى من هو 6 ابتدائي وهو اكبر اخوانه كانو يسكنون بشقه ايجار ماكان عندهم أحد يصرف عليهم اختار انه يدرس ويشتغل لين اغتنى واغنى اهله معه وبعد ماتخرج من الجامعه صار يشتغل بدوامين ..
سلمان: السلام عليكم ورحمة الله وبركاته
ام سلمان: ياهلا والله بهالوجه
سلمان ابتسم غصب وهو تعبان : هلا بك يمه وشلونك اليوم؟
ام سلمان: بخير ياجعلك بخير ((وتنادي الشغاله)) ياسونيا .. سونيا حطي العشاء يالله
طلت فجر مع باب المطبخ مبتسمه : وش حاجتكم لسونيا وفجوره موجوده
سلمان: هههههه عسى الله لايحرمنا منها ان شاء الله
جات فجر وحضنت اخوها اللي تعتبره ابوها : شلونك
سلمان: بخير انتي اللي وشلونك؟
فجر : بخير وعزوز اتصل ويسلم عليك كثير السلام
سلمان: الله يسلمه .. انا ابي اتصل عليه بس انشغلت
ام سلمان: خلاص يايمه مره ثانيه ان شاء الله
سلمان: لالا بكلمه اللحين يمكن يبي شي محتاج شي
فجر: اوكي انا بروح احط لكم العشاء على ماتكلم عزوز
سلمان : طيب خلاص
طلع سلمان جواله واتصل على عبد العزيز
عبد العزيز: هلا والله
سلمان: هلا فيك يالغالي وشلونك يبه ؟
عبد العزيز : بخير عساك بخير انت بشرني عنك؟
سلمان: كلش مثل ماتبي .. كيف دراستك؟
عبد العزيز : ادعولي وان شاء الله ما اخيبكم
سلمان: تكفى ياعبد العزيز حط بالك على دراستك
عبد العزيز : يالغالي انا لو ما اشتهي ادرس بس اتذكر وش كثر تعبت معي عشان اكمل دراستي برا اطير طيران عالكتب
سلمان عيونه دمعت من الفرحه بأخوه: ههههههههه الله يوفقك.. اليوم فجر مسويه لنا العشاء
عبد العزيز: هههههههههههه عليكم بالعافيه
سلمان : تامر شي؟
عبد العزيز: سلامتك
سلمان: مع السلامه يبه
عبد العزيز : بحفظ الله
ام سلمان: هاه وشلونه ياوليدي؟
سلمان مبتسم: يقول ان شاء الله امتياز
ام سلمان ترفع كفوفها للسما : يااااالله جعلني افرح فيك ياسلمان
سلمان يضحك : ههههههههههه لا يايمه انا راحت علي خلاص عزوز وفجر وجوري هم عيالي الله لا يحرمني منهم ولا منك.. الا على طاري جوري وينها فيه؟؟
ام سلمان: العوبه زعلانه
سلمان: افاا من مزعلها؟؟؟
ام سلمان: تقول طفشانه وتبي تطلع وقلت لها مابه أحد يوديها
فز سلمان من مكانه: وانا وين رحت؟؟؟ يالله اليوم بنتعشا برا
فجر اللي كانت طالعه من المطبخ بالصحون سمعت الجمله وبخيبة امل قالت : وشهووووو
سلمان: فجوره
فجر زعلانه: خير
سلمان: بشاورك واللي تحكمين فيه يمشي زين؟
فجر : زين
سلمان: اختك زعلانه يصير لك نفس تاكلين؟؟
فجر: ايه يصير لي
سلمان:الزبده.. نتعشا برا واوديكم الملاهي واذا رجعنا تسهرون عالعشا اللي انتي مسويته
فجر : لا نتعشا من اللي انا سويته ثم نطلع
سلمان : ههههههههه موافق وامري لله
فجر ابتسمت لسلمان : الله لايحرمنا منك يارب
سلمان : ولا يحرمني منكم .. ابطلع لجوري
طلع سلمان لغرفة جوري واللي صممها سلمان وردي على ذوق جوري... وطق باب الغرفه مارضت تفتح .. طق مره ثانيه .. مارضت تفتح .. المره الثالثه تكلم : جوري يبه هذا انا
جوري بسرعه فتحت الباب وبنبرة زعل : اسفه احسبك فجر
سلمان: وحتى لو فجر اللي عند الباب عيب يايبه تسفهين الناس
جوري وهي زعلانه : طيب
سلمان: وش فيك زعلانه؟؟؟
جوري :سلومي تكفى جيب لنا سواق
سلمان: الف مره قلت لكم سواق لا انا مستعد اوديكم لكل مكان بس سواق لا
جوري: بس انت تتعب مره
سلمان: اهم شي انتو ترتاحون... وعلى فكره اليوم جاي على بالي اوديكم الملاهي بس بشرط
جوري والوناسه مبينه بعيونها: وشهو؟
سلمان: تنزلين تتعشين معنا
جوري: موووووافقه
سلمان يضحك : هههههههههه يالله اجل ننزل
’,
’,
’,
الساعه 2 ونص الظهر ببريطانيا .. عبد العزيز اخر سنه له وياخذ الشهاده ويرجع السعوديه يحس انها ثقيله وصعبه رغم انه متفوق فتح باب شقته اللي يسكن معه اصحابه فيها الشقه كانت عباره عن 3 غرف وصاله .. عبد العزيز طالع باللي بالصاله شاف هيثم ومعاه بنت امريكيه.. عبد العزيز اللي عصب وتكلم بالعربي: هيثم وش جايب هالزباله هنا؟؟؟؟
هيثم: بشويش لاتصرخ طيب شفيك ياخي
عبد العزيز : من هذي؟؟؟؟
هيثم : خويتي ياخي وش فيك؟
عبد العزيز : هيثم برا شقتي سو اللي تبي .. خربط على كيفك .. لكن هنا التزم لو سمحت
هيثم : الله واكبر يالعاقل..
عبد العزيز : الدعوى مو دعوة عاقل ولا مهبول .. الدعوه دعوى انا جايين ندرس مو نخربط احيان نستهبل بس ماتوصل لهالدرجه
هيثم : والمطلوب اللحين؟؟
عبد العزيز يناظر للبنت بقرف : اطرد هذي برا والحقها اذا مايرضيك كلامي
هيثم سحب البنت وطلعو برا .. عبد العزيز عارف انه بيرجع ولازم يتكلم معه زين ويتفاهمون عالحدود اللي مالازم احد يتعداها بهالشقه .. حط عبد العزيز لاب توبه وكتبه واغراضه عالطاوله بس شاف شي خلاه يجمد ... اكواب وجنبها ثلج ... قرب الكوب وشمه .. ريحة خياس .. حسبي الله عليك ياهيثم خمر في شقتي .. عبد العزيز راح لغرفة فيصل يصرخ: فيييييييييييصل فييييييييييصل
فيصل اللي توه صاحي من النوم : همممممم
عبد العزيز : شف الحقير صاحبك بنات وخمر بالشقه
فيصل : هااه؟
عبد العزيز : هوا .. اقولك قوم اتصل فيه قول له شقتي تتعذره هذا اللي ناقص
فيصل: خلاص هات تلفوني انا اكلمه
رجع عبد العزيز وهو معصب من هيثم بعد ما تأكد ان فيصل كلمه .. دخل فيصل على عبد العزيز بالصاله وهو يشبك النت وحط فيصل الفطور قدامه
فيصل : هاه وش صار على خواطر؟
عبد العزيز : من خواطر؟
فيصل : خواطر مكسوره
عبد العزيز : أيه للحين ما سويت شي
فيصل : عزوز وش تبي تسوي؟
عبد العزيز : ابجيب راسها اللي ماقدرتو تجيبونه وبعدين خلاص
فيصل بخوف: وش اللي خلاص؟؟وبعدين إنسى سالفة هالبنت خلاص ياخي دراستنا أهم
عبد العزيز وابتسامته اللي تميزه على جنب وحاجبه مرفوع : ماخلقت اللي تستحق إحترامي وتشغل وقتي .. انا قلت لك بس بجيب راسها وخلاص
فيصل : تكفى يالواثق هههههههههه كني اشوفك تجر أذيال الخيبه ههههههههههههههههه
عبد العزيز : تتريق انت ووجهك ..
وسكت شوي وضحك: ههههههههههههههه جاتني فكرره
فيصل : وش هي؟؟
عبد العزيز : تعال جنبي وبتشوف بنفسك
دخل عبد العزيز المنتدى اللي هو مسجل فيه اساسا وسجل بإسم جديد وارسل رساله لخواطر مكسوره
بهالوقت كانت وريف منفخه عيونها من كثر البكا .. الجرح رغم مرور عليه 4سنوات بس هو لازال مفتوح وأي رشة ملح تزيد المواجع ..
قامت وضت وصلت الفجر وتجهزت للجامعه وبقى معها نص ساعه على ما زياد ولد خالها يجهز ويوديها هي وشادن للجامعه
فتحت النت فتحت المنتدى وسجلت دخول.. لقت رساله خاصه من وحده إسمها أسيرة الذكريات عجبها النك بالحيل فتحت الرساله
((السلام عليكم اختي خواطر .. أنا بصراحه وحده من المعجبين بكتاباتك الروعه .. وسجلت بالمنتدى بس عشان أشكرك خصوصا على اخر خاطره اللي أمس نزلتيها تسلم يدينك لاعدمناك .. بس انا عندي مشكله وابي آخذ رايك لأنك قدوتي بالكتابه .. أنا أبي أألف كتاب بس ما ادري اذا كتاباتي تصلح للنشر او انها غباء..
اذا ماعندك مانع هذا ايميلي))
هالوقت رن جوال وريف اسم شادن ..أكيد تبيني انزل
وريف: هلا
شادن: وريف بسرعه إنزلي
وريف: زين ان شاء الله
قفلت وريف الجهاز وطلعت تركض بسرعه دخلت السياره
وريف : السلام عليكم
زياد+ شادن : وعليكم السلام
وصلو الجامعه ونزلو .. شادن راحت محاضرتها .. اما وريف ماعندها محاضرات الا الساعه 12 بس ماعندها أحد يجيبها واضطرت تجي بدري ..فجأه شافت فجر بزوايه الكافتريا راحت شبه تركض من الفرحه : فجووووور يالدبه مداومه انتي؟
فجر: هلااااا والله ايه مداومه
وريف : ورا ماقلتي لي؟
فجر : توقعت ماتجين بدري
وريف: تعرفين اني ماعندي أحد يجيبني
فجر :اهاا صح نسيت.. تعالي نفطر على الطاوله اللي هناك
بعد ماجلسو البنات وافطرو تذكرت وريف الرساله اللي اليوم
وريف : الا ماقلت لك
فجر: وشهو ؟؟
وريف : اليوم وحده مرسله لي تقول تبي تطلع كتاب وتبي تشاورني في كتاباتها
فجر: وريف ودي اقولك شي بس أخاف تفهميني غلط
وريف: امريني قولي
فجر: اللحين انتي كتاباتك معروفه بين العالم .. واسمك مشهور .. ليش ماتبيعين كتاباتك ؟؟ اقل شي تدبرين امور كتب الجامعه
وريف تنهدت : فكرت بهالفكره بس اذا سويتها يبي لي ألتزم للي أبيعهم وانا ما أحب الإلتزام ..وغير كذا اذا التزمت ابنسى دراستي
فجر: لالالالا الا الدراسه ههههههههههههه
وريف: هههههههههههههه
رجعت وريف من الجامعه سلمت على امها وطلعت صلت العصر وناظرت بالكتاب افففف كبير مايمديني أذاكره كله وبكره الامتحان .. من التعب نامت بشرشف الصلاه عالسجاده الساعه 8 صحت وفتحت الكتاب تذاكر
’,
’,
’,
بهالوقت في بريطانيا ..
فيصل : هاه ردت عليك؟
عبد العزيز : لا اسحبت علي
فيصل : قلت لك ثقيله ماترد على احد ههههههههههههه
عبد العزيز : وراها وراها لين اجيب راسها
فيصل : خلاص يابوي إتركها بحالها
عبد العزيز بعناد : مو عبد العزيز اللي يخسر فهمت
فيصل: فهمت والله يعينك
شادن واللي عندها امتحان بكره ابتدت تذاكر الساعه 10 الليل .. شادن انسانه منعزله ماتخالط الناس يعني كافيه خيرها شرها.. لاصداقات ولا علاقات
الساعه 3 بالليل وريف راسها كبر الفيل من الصداع قررت تنزل تسوي لها قهوه تعدل بها راسها وترجع تكمل مذاكره طلعت من الباب وهي تترنح من التعب وقابلت عمها وزوجته قاعدين بالصاله :السلام عليكم
ابو زياد: هلا وريفه شلونك
وريف : هلا خالي بخير عساك بخير وشلونك انت
ام زياد: وريف حبيبتي ليش مافتحتي لي قبل شوي يوم كنت جايبه لك العصير
وريف بقلبها ((الله واكبر يالنصب كل ذا عشان خالي جالس ولا كان طلعت على حقيقتها )): لا ياخالتي ماله داعي تتعبين نفسك
ونزلت وريف للمطبخ وخلتهم .. خالها طيب بس شخصيته ضعيفه .. اف يقهر سوت لها كوبين قهوه لها ولشادن اللي اول ما سكنو معهم حاولت تتقرب منها .. لكن شادن صدتها ..
طلعت لغرفة شادن وطقت الباب وفتحته شادن
شادن: نعم
وريف: سويت لك قهوه عشان تصحصحين زين للمذاكره
شادن: شكرا
وريف:العفو بالتوفيق
شادن بإبتسامه : وياك
صكت الباب ورجعو كل وحده تكمل مذاكره..
الساعه 8 ونص طلعت وريف بعبايتها وكتابها بيدها والطرحه على كتوفها تنتظر شادن تجهز وزياد تحت ينتظرهم .. ماحست إلا باللي ماسكها من شعرها ناظرت باللي ماسكتها :خير وش تبين؟
ام زياد: والله ياحيوانه ان ماتعدلتي لتشوفين شي ماشفتيه
وريف بتمرد : وانا وش سويت؟؟
ام زياد: كفايه انا لامينك انتي وامك من الشارع ومتصدقين عليكم بالعيشه
وريف جرحها الكلام بس كابرت : لا صرتي دافعه من فلوسك شي تكلمي
وراحت بسرعه وريف عشان تخبي دمعتها اللي نزلت على صفحة الكتاب .. جلست وريف على الدرج الداخلي وفتحت القلم وكتبت على صفحة الكتاب ((على صفحة الحزن كتب إسمي بالسواد))
بهالوقت وصلت شادن وطلعو الثنتين لزياد وراحو لإختبارهم ..
فجر: ترى لازم تعلمين خالك عليها هالكلبه
وريف: يافجر وش لي بالمشاكل وانا ضيفه؟؟ تهقين انه بيوقف ضد زوجته ام عياله عشان خاطري يمكن مره يدافع عني .. ومره ثانيه بس آخرتها بيطفش مني ومن أمي
فجر:الله يعينك ان شاء الله.. هاه رديتي على البنت اللي بتشاورك بالكتاب
وريف حطت يدها على فمها : يافشيلتي منها .. نسيت والله نسيت
فجر : ماعليك إكتبي لها كنت مشغوله ومافتحت النت
وريف: هذا اللي بسويه
سلمان : كان بألم بصدره فظيع .. الم مو طبيعي خلاه يطلع من الدوام اليوم بدري.. اتصل على فجر وقال لها انه بيمرها اللحين دامها خلصت من الإختبار..
وصلت وريف الساعه 2 ونص الظهر دورت امها وحضنتها : وشلونك يمه
ام وريف : بخير شلون امتحانك اليوم؟
وريف: يجنننننننننن الحمد لله
ام وريف : الحمد لله
وريف : عن أذنك أبريح شوي
طارت وريف عالغرفه وشبكت النت وفتحت المنتدى وردت على اسيرة الذكريات
((هلا اختي ..آسفه تأخرت بالرد كان عندي ظروف أشغلتني مادخلت امس .. عموما اتشرف بك .. وابضيفك عندي بس لو سمحتي لا احد يدري اني ايميلي عندك ))
عبد العزيز اللي كان مسجل دخوله بإسمه الأساسي ((كبرياء الجرح)) اول ماشاف خواطر مكسوره متواجده بالمنتدى طار عالمتواجدين شافها تحوس بالرسائل الخاصه طيران سجل خروج وسجل دخول بإسم اسيرة الذكريات.. لقى رساله خاصه من خواطر مكسوره قراها وفتح الماسنجر وجاته إضافه من ايميلها
لقاها اون لاين وهو كان اوف لاين كان نكه ((القلب دكان وكلن له مكان)) مسح النك وفكر فكر بعدين تذكر توقيع واحد من أخوياه بكتابه ((الأفق لا يعني السماء))
اما وريف كان نكها .. (( على صفحة الحزن كتب إسمي بالسواد))
::دخل عليها عبد العزيز ::
الأفق لا يعني السماء:
السلام عليكم
على صفحة الحزن كتب إسمي بالسواد:
وعليكم السلام هلا أسيره
الأفق لا يعني السماء:
هلا خواطر شلونك ؟؟
على صفحة الحزن كتب إسمي بالسواد:
انا بخير بشريني عنك حبيبتي
الأفق لا يعني السماء:
حبتك العافيه يارب .. انا بخير
((دخل فيصل بهالوقت وناداه عبد العزيز :لا يفوتك
فيصل: وشهو؟؟
عبد العزيز : خواطر اون لاين
فيصل : يلعن ابو الحركاااااااااااااااااااااات
وجاء جلس جنب عبد العزيز يقرى المحادثه
الأفق لا يعني السماء:
اسفه باك ..
على صفحة الحزن كتب إسمي بالسواد:
لا عادي اذا مشغوله اطلعي
الأفق لا يعني السماء:
مو مصدقه وااااااي .. اني اكلمك يا الغاليه
على صفحة الحزن كتب إسمي بالسواد:
ههههههههه لا صدقي يالغلا انا اختك خواطر بشحمها ولحمها
الأفق لا يعني السماء:
تصدقين امي تسلم عليك واجد وتتابع كتاباتك ويعجبها فيك ثقلك على الشباب
على صفحة الحزن كتب إسمي بالسواد:
الله يخليها لك يارب بوسي لي راسها
الأفق لا يعني السماء:
مايمديني
على صفحة الحزن كتب إسمي بالسواد:
ليش؟
الأفق لا يعني السماء:
انا أدرس ببريطانيا وهي بالسعوديه
على صفحة الحزن كتب إسمي بالسواد:
اهاا الله يعينك على فراقها
الأفق لا يعني السماء:
امين يارب ..
على صفحة الحزن كتب إسمي بالسواد:
يالله وريني من كتاباتك دامنا فاضين
((توهق عبد العزيز : فيصل انقذنييييييييييييييييي
فيصل : وش اسوي لك؟؟
عبد العزيز : وش اقولها ؟؟ انا عمري ما كتبت سطرين على بعض ياربيييييييييييييييه))
على صفحة الحزن كتب إسمي بالسواد:
وينك ؟؟؟
الأفق لا يعني السماء:
انا هنا بس ادور بجهاز صديقتي شي من كتاباتي مالقيت
على صفحة الحزن كتب إسمي بالسواد:
اهاا اجل متى مادخلتي من جهازك وريني كتاباتك
الأفق لا يعني السماء:
ان شاء الله
على صفحة الحزن كتب إسمي بالسواد:
الا انتي تحبين الشعر ولا الخواطر بالفصحى ولا بالعاميه ؟؟
((عبد العزيز : فيصصصصصصصصصل وش هالنشبه ذي
فيصل : هههههههه دبر عمرك))
الأفق لا يعني السماء:
لا أنا أحب اللي تكتبينها
على صفحة الحزن كتب إسمي بالسواد:
اهاا خواطر يعني .. حلو حتى انا أفضل الخواطر
الأفق لا يعني السماء:
<<<وجه مبتسم
على صفحة الحزن كتب إسمي بالسواد:
على فكره نكك مره حلو .. من كتاباتك؟
الأفق لا يعني السماء:
لا والله بس جمله غاليه علي كثير .. اوكي خواطر تامريني بشي ابوي جاء
على صفحة الحزن كتب إسمي بالسواد:
غريبه امك بالسعوديه وابوك معك؟؟
الأفق لا يعني السماء:
ايه تعرفين انا بنت صعب يخلوني بلحالي
على صفحة الحزن كتب إسمي بالسواد:
زين ما اعطلك تشرفت بمعرفتك مع السلامه
الأفق لا يعني السماء:
مع السلام ه
2معجب
رد مع اقتباس
العلامات المرجعية