تسودن عقلي من حبك.. جنابك
وبخت كلمن مسى وكاعد.. جنابك
اسومن والتمس حظرة ..جنابك
الف نعلة على ابوك العم عليه..

حبيبي شلون ما احبك.. ولابيك
وامك ماتحن مثلي.. ولابيك
عساهن بية لوعاتك.. ولابيك
ويحول كل مرض منك اليه..

ابيك آنة وابد ماكول.. مابيك
يل كلك محنة وشين.. مابيك
غبت عني واكول شبيك.. مابيك
من اغيبن هم يظل بالك عليه..

مليت انا ايامة و..مادفني
واعزفت من نار كلبي.. مادفني
متت اني بمحبتة.. مادفني
ما حطني بكبر حط الكبر بيه..

غيابك خلخل اعضامي.. وهدهن
وجر حسرات ببعادك.. وهدهن
آلي دمعات لو ابجي.. وهدهن
تفيض اليابسة ونغرك سويه..

شجاك شغيرك عني..ولاهاك
وحك رب البشر كلها.. ولاهاك
بعد شبيك ما اكلك.. ولاهاك
ولا اريدك تجي وتسأل عليه..

لجل عينك لشد رتبة ..ملازم
وبحبك لظل اطبع.. ملازم
واذا متريدني!!عوفني.. ملازم
الف واحد يذب روحة عليه..

كلبي انت ملكتة.. وانت حر بي
عليل وطبي عندك.. وانت حر بي
كأس السم اشربة.. وانتحر بي
اذا غيرك يمس اطراف اديه..

كلب صافي لون تهوة.. كلبنة
وابد مايوم عالصاحب ..كلبنة
احنة ضلوع الك وانت.. كلبنة
ونبض كلبك يرد الروح بيه..

ردت طيفك بيوم يلوح.. مالح
وطعم فركاك صار هواي.. مالح
بعد ما ادز رسالة وبعد.. مالح
لان كلما ادز مترد عليه..

قلم كلبي تداين ..ورقة منة
لان ماكو بجمالك ..ورقة منة
اسجلك انت الاول ..ورقة منة
واكتب لافتة محجوز اليه..

أمفارك واليالي سنين.. مرن
وعلي صاير لذيذ الزاد ..مرن
طفر كلبي على النقال.. من رن
لان حسيت روحي آدك عليه..

سن سيفة الدهر بحشاي.. سنتين
واتمنى من العمر وياك.. سنتين
وابشرك من رصيدي بقت.. سنتين
اذا عندك رصيد اتصل بيه..

انا الصياد صادتني.. شبكتك
ودخيل الله شكثر حلوة.. شبكتك
ادك عليك مشغولة.. شبكتك
اظن مغلق جهازك بس عليه..

بعد وياك ماامشي.. ولا خط
وبعد ما اكتب بأيدي.. ولا خط
مبايل آني ماعندي.. ولا خط
حبيبي شلون حتخابر عليه..

سلني الشوك صاير.. شعرة منك
وانت الشعر ياخذ.. شعرة منك
احلف عال يمسن.. شعرة منك
اكتلو ولوصار ملك المنيه..

حلفت دموعي بعدة.. من شفاهة
جروح الكلب يائس.. من شفاهة
دواهن بوسة وحدة.. من شفاهة
دورت ..مامش البوسة بصيدليه..

بيادر شوك اصيرن.. لونة منك
وانت الورد ياخذ.. لونة منك
الك خدين خايب ..لونة منك
ابيع البوسة وحدة بتسع ميه..

%%%%%%%%%%%%


ذبعد كلبي على شوكك مالحنه
بسبب عنبك جفوفي مالحنه
ابد مابيك غزر مالحنه
كلت زادي ونويت تعظ اديه

تكلي من حبي فكيتك وشفاك
نعليت ويمك دواي وشفاك
وصفتي آخذ بوسه من الخدين وشفاك
ومن آخذ الوصفه يشفى كل مرض بيه

يحن كلبي على حبك من احبك
واخذ زهوة شبابي مني حبك
انشدك ياهو الاكثر مني حبك
حته بهالسهوله تخون بيه

روحي اشتاكت لشخصك وحنيت
ولويت ظلوعي بفراكك وحنيت
وحقك جاجبت حنه وحنيت
عتبة داري لو مريت بيه

الوكت غثانه كلش ولمانه
وتراده ووله خيره وله امانه
هدم بيت الجمعنه والمانه
وخرايب ظلت الجانت زهيه

ابد مايوم من همك خليتان
وبعد خل ينتضر كلبي خليتان
اخبرك بالجسد ظلن خليتان
الك وحده اوهبتهه ووحده اليه

الليالي بكاسهن حنظل حسلي
ومثل ما احسنت محد حسلي
لهجن واشرد بهدمي حسلي
ولا اشوفن حلالي وماهو اليه

البشر لو مات كلبه ماتشوفه
وضمير الناس جنه مات اشوفه
عسن عين اللي حكلهه ما تشوفه
عمه اسود صابهه لحد المنيه


يمن ليك الكلب يخفك ولاجن
وشوغاتك كلن عمري ولاجن
صدك تنساني يمعود ولاجن؟
هذاك انته الجنت تغفه على اديه

على مودك عفت ربعي وناسي
واسد بحلوك شماتي وناسي
اذا عني غفل كلبك وناسي
انه بطرواك لسه وتدري بيه

صرت من كثر ظيمي منخلاني
ولا شفت الفزعلي منخلاني
بعد ما احسبه صاحب منخلاني
وحيد وضّحك الشامت عليه

عليك الروح تجذبني واردهه
لان كلبي نبع صافي وردهه
شلون تغيب وانته اسمك وردهه
واردلك بالشعر غصبن عليه

كلبي صار بسمك يعني مالك
وشنهو اللي بقالك عندي مالك
عشت بقصر حبك وانته مالك
ورضيت بجورك وضلمك عليه

اسولف محد بربعي يعيني
اريد العون ماواحد يعيني
كافي من البجي والمن يعيني
البجيت الهم صفوا عدوان اليه

اصيل انته ومضيفك دوم تنضاف
وكلبي وياك من الالم ينضف
العمر فوك العمر ياريت ينضاف
لشيلن كلبي الك وانطيه هديه
ا
احبك من صغر سنك ويهلك
ليش الي يحب يتعب ويهلك
اغار عليك من تكعد ويه اهلك
اذا ويه الغريب اشلون بيه


كلب صافي لون تهوه كلبنا
ولافد يوم على الصاحب كلبنا
احنا اظلوع الك وانته كلبنا
ونحافظ على الكلب من كل اذيه

شوف شلون حالي من تسني
والكم سيف صدك من تسني
الدمع يغلب جوابي من تسني
اضحك بل الجذب غصبن عليه

اجيك ازحوف ماتعب ولفحط
وبنص الكلب ياوادم ولفحط
الف حراس لو خلو والف حط
اجيكم واليصير ايصير بيها

نه اسكت من تعاتب ليش مارد
بسبب لانك اثنين اجلاي مارد
تره من ازعل عليك انوب مارد

توقيع : امير و انيق

أن الرياح تهب وتصل اليك ثم تعود الي فأشم منها رائحة أسمك

حبي امير

ابوذيات فعلاا رائعه ومميزه

لك تحيتي

وحك الي تعبده الناس فرضا

_صبح حبك عليه اليوم فرضا

_ اذاكالوا تعوف إهواك فرضا_

إشتكول تعوفني لولاخطيه_

امبراطور الغرام

شكرا حبي امبراطور على المرور

توقيع : امير و انيق

أن الرياح تهب وتصل اليك ثم تعود الي فأشم منها رائحة أسمك