راح ليل الشعر مابين المعاني والجزاله
في عيون الشعر دور الحرب بارود وسريه

شعر شاعر بالمشاعر شاع شعره واستواله
كيف ماجات القوافي جرها بالسامريه

اتزان الحظ واضح لو بدا عيب اختلاله
وانحلال الوصل جارح لو بدا سن الثنيه

ماتت عروق العنب والتوت يرثي مابقاله
والنهايه فالبدايه والحكايه سرمديه

انجرح وجه المساء والكون يصرخ من خلاله
وانتحى فكر ولحى من دون مضمون القضيه

والشفق قبل الغسق لو يدفق الحمره سراله
بإتفاق الاختراق وبإنطباق الجاذبيه

والنكد بعد الرمد مثل الردى بعد الشكاله
والنخل لا مابخل لو شحت عروق ٍ نديه

والنقا روح التقا عند الشقا وإلا زواله
والاوادم لو تنادم مابقى نفس ٍ شقيه

والعيوب ذنوب والجاني على راس العداله
والحروب دروب صوب الموت ويدين المنيه

والجفا بعد الوفا بعد الصفا جرح ونكاله
والامور تدور من قبل العصور الاوليه

حسب تقدير الاله المعتلي رب الجلاله
خالق الخلق ومليكه عالم السر وخفيه

والرضا حين القضا بالمقتضا شرط ودلاله
والعفو عند اقتدار المرء من طيب السجيه

والفتن جرح الوطن وقت المحن فعل الجهاله
والخطا رد العطا جهل وسطا وسط البريه

والهوى لامن ضوى ماله دوى ياشين فاله
راعي الحب ودروبه ماتجيب الا الاذيه

وافتراض الاعتراض أدى الى سرد المقاله
والحقيقه مابقى غير الحروف الابجديه

اسمعوني وافهموني وصلوله ذا الرساله
كان باقي للهوى في قلب محبوبي بقيه

علموه أني شربت الحب من صافي زلاله
وعلموه أني نذرت العمر من أجله هديه

وعلموه أني سكرت من الهوى حد الثماله
وعلموه أنه جعلني عن هجير الشمس فيه

وعلموه أنه كتبني شعر في دفتر خياله
وعلموه أنه وضع شمس المحبه في يديه

وعلموه أنه غزى الخفاق واسرف باحتلاله
وعلموه أنه تمكن بالحشا وأل الرعيه

وعلموه أنه عطاني وعد في مقبل لياله
مايروح ولايبوح ولو تفوح الشاذليه

وعلموه أني أبسهر في رجا رن أتصاله
وعلموه أني برجوى ياهلا يالله حيه

وعلموه أني احبه حب مايخطر في باله
وعلموه أني أحب مشاهده لوهي شويه

وعلموه أن القصايد من يمينه في شماله
فدوة لعيونه الثنتين مع زاك التحيه

وعلموه أن المشاعر كلها مني حلاله
وعلموه أن الخوي دايم على هقوة خويه

وعلموه وفهموه وصلوها له رساله
والوصيه وسط مظروف الغلا نص الوصيه

شاعر لو غاب مادور على شخص بداله
مال لغيره في خفوقه شف والا قابليه


منقوووول